Roedd ASE Plaid Cymru, Jill Evans ac ymgeisydd seneddol y Blaid dros Ynys Môn, Dylan Rees, yng Nghaergybi ar Ddydd Gwener i gwrdd â physgotwyr Ynys Môn.
Ymunodd y cyn ASE, Eurig Wyn, sydd yn un o ymgeiswyr Plaid Cymru yn yr Etholiadau Ewropeaidd ym mis Mehefin, gyda nhw.
Gweler o’r chwith i’r dde yn y llun yn Noc Pysgod Caergybi: Eurig Wyn, Peter Carmichael (Solitaire Marine Services), Jill Evans ASE a Dylan Rees.
Dywedodd gwleidyddion Plaid Cymru y byddent yn lleisio pryderon y pysgotwyr gyda’r Gweinidog dros Faterion Gwledig, Elin Jones, yn enwedig y diffyg rhybudd a gafwyd ynglyn â newidiadau i ardaloedd pysgota.
Fe gwrddon nhw â physgotwr lleol, Ian Hughes a chyda Peter Carmichael o Solitaire Marine Services, sydd yn cyflogi criw o bump. Fe wnaethon nhw sôn wrth wleidyddion Plaid Cymru am yr heriau maen nhw’n eu hwynebu wrth ymdrin â chwotâu a chyfyngiadau ar le gawn nhw bysgota.
Dywedodd ASE Plaid Cymru, Jill Evans:
"Rydym ni ar ochr y diwydiant pysgota Cymreig ac roeddwn yn falch i allu dod yma heddiw a chlywed eu pryderon. Mae’n rhyfeddol ein bod yn allforio tua 140,000 tunnell o gimychiaid a physgod cregyn bob blwyddyn ond yn mewnforio tua’r un nifer o Ogledd America.
"Gyda’r galw cynyddol am fwyd o ansawdd da a gynhyrchir yn lleol, dylwn fod yn gallu dal a phrosesu pysgod yn lleol ac yna eu cyflenwi i siopau yn y wlad hon. Byddai hyn yn hwb i’r diwydiant pysgota Cymreig ac rwy’n ymgyrchu dros gael mwy o gefnogaeth ar gyfer cynhyrchu bwyd yn lleol."
Dywedodd ymgeisydd Plaid Cymru ar gyfer Ynys Môn, Dylan Rees:
"Yn ystod cyfnod o ddirwasgiad economaidd, mae’n hanfodol ein bod yn gwneud y cyfan a allwn i gefnogi a hybu diwydiannau bychain fel hyn yn hytrach nac achosi anawsterau pellach. Mae hwn yn ddiwydiant pwysig ar gyfer Ynys Môn ac mae’n hanfodol ein bod yn gwneud popeth allwn ni i gadw ein diwydiant pysgota yma yng Nghaergybi.
"Mae’r diwydiant pysgota yn wynebu heriau difrifol wrth ymateb i’r cwotâu newidiol a’r cyfyngiadau ar le gallan nhw bysgota. Rhaid i ni weithio gyda’n gilydd i sicrhau bod y newidiadau yma’n cael eu gweithredu mewn modd sensitif fel y gall pysgotwyr gynllunio a pharatoi ymlaen llaw yn gywir."
Diwedd.
