Mae Llywydd Grwp Cynghrair Rydd Ewrop (EFA) ac Aelod Seneddol Ewropeaidd Plaid Cymru, Jill Evans, wedi llongyfarch ei chwaer blaid ac aelod o EFA, sef yr N-VA (Cynghrair Newydd Fflandrys) ar ei buddugoliaeth hanesyddol yn Etholiadau Ffederal Gwlad Belg ddoe.

Dywedodd Ms Evans:

"Mae hwn yn ganlyniad hanesyddol ar gyfer Fflandrys ac i Ewrop. Rhoddodd yr N-VA raglen o newid ger bron pobl Fflandrys a’i derbyniodd yn frwdfrydig. Mae’n amlwg fod gan ei neges o symud tuag at fwy o hunan lywodraeth i Fflandrys o fewn Gwlad Belg Conffederal lawer iawn o gefnogaeth.

"Rhaid i’r Undeb Ewropeaidd ymateb yn gadarnhaol i’r datblygiadau cyffrous sydd yn digwydd yn Fflandrys a Gwlad Belg. Gyda llywyddiaeth Gwlad Belg o’r Undeb Ewropeaidd ar fin dechrau, edrychwn ymlaen at y trafodaethau ar Fflandrys yn Ewrop.

"Rwy’n llongyfarch yr N-VA ar ei chanlyniad etholiadol rhyfeddol."

Diwedd.

Nodyn

Enillodd yr N-VA, sef chwaer blaid Plaid Cymru sydd hefyd yn aelod o Gynghrair Rydd Ewrop (EFA) Etholiadau Ffederal Gwlad Belg Ddydd Sul a dod yn blaid fwyaf Fflandrys, ac ar draws Gwlad Belg hefyd.