Mae ASE Plaid Cymru Jill Evans wedi beirniadu Comisiwn Ewrop unwaith eto am ohirio penderfyniad ar wahardd rhywogaethau newydd o India-corn sydd wedi’u haddasu’n enetig.

Daw’r ddadl yn ystod yr un wythnos i ymgyrchwyr gwrth GM yng Nghymru feirniadu Prif Ymgynghorydd Gwyddonol y Cynulliad am wneud sylwadau oedd yn cefnogi organebau GM mewn cyfweliad i bapur Dydd Sul. Mae gan y Cynulliad bolisi o gadw Cymru’n rhydd o organebau GM.

Ystyriwyd y ceisiadau ar gyfer amaethu rhywogaethau o India-corn GM sydd yn ymwrthol i bryfed gan y Comisiwn Ewropeaidd ym Mrwsel ac roedd ymgyrchwyr gwrth GM yn obeithiol o ennill gwaharddiad. Ond ynlle hynny, gohiriwyd y penderfyniad gan y Comisiwn unwaith eto, gan gyfeirio’r pwnc yn ôl i’r Awdurdod Ewropeaidd ar ddiogelwch Bwyd.

Dywedodd ASE Plaid Cymru, Jill Evans:

"O ystyried mor eang a chryf yw’r gwrthwynebiad cyhoeddus i organebau GM, rwy’n siomedig fod Comisiwn Ewrop wedi methu a gweithredu unwaith eto. Mae angen iddyn nhw wneud safiad cadarn ar hyn a gwahardd awdurdodi organebau GM newydd yn hytrach nac osgoi cymryd cyfrifoldeb.

"Yng Nghymru, mae’r Gweinidog Materion Cefn Gwlad, Elin Jones, wedi cadarnhau bydd y llywodraeth yn dilyn y trywydd mwyaf cyfyngol posib ar gnydau GM. Dylai’r Comisiwn fabwysiadu’r egwyddor ragofalus hwn o ddifrif a’i weithredu’n iawn..

"Dylai’r ansicrwydd ymhlith Comisiynwyr a phryder nifer o lywodraethau ynglyn â’r asesiad risg ar gyfer cynnyrch GM fod yn ddigon i gyfiawnhau gwaharddiad."

Diwedd/End.