Mae ASE Plaid Cymru, Jill Evans, wedi croesawi pleidlais yn Senedd Ewrop mae hi’n gobeithio fydd yn hwb bwysig i ffermio defaid a geifr yng Nghymru.

Pleidleisiodd Aelodau o Senedd Ewrop i gymeradwyo argymhellion newydd sydd yn cael eu hystyried yn gynllun achub ar gyfer y sector sydd wedi bod yn dirywio ac wedi bod yn brwydro i gynnal adferiad ers dechrau clwy’r traed a’r genau yn 2001. Mae’r Aelodau Seneddol Ewropeaidd wedi cytuno ar gyfres o gynigion yr hoffent weld yn cael eu cymeradwyo gan Weinidogion Amaeth yr Undeb Ewropeaidd, gan gynnwys cynnydd mewn cymorth ariannol i atal y dirywiad mewn cynhyrchu a mesurau newydd i gynyddu cymeriant.

Yng Nghymru, mae’r nifer o ddefaid ac wyn wedi lleihau o bron i ddeuddeg miliwn yn 1999 i lai na naw a hanner miliwn yn 2006. Cadwodd bedwardeg un y cant o holl ffermydd Cymru ddefaid yn ystod 2006.

Ynglyn a’r prif bwnc o dagio defaid, gwrthodwyd y sustem ‘optio i mewn’ yn y bleidlais olaf. Mae’r ASE Plaid Cymru yn gwrthwynebu tagio gorfodol i ddefaid.

Dywedodd Jill Evans:

"Mae ffermio defaid wedi bod yn wynebu amserau anodd ers nifer o flynyddoedd ac fe drawyd y diwydiant yn galed gan glwy’r traed a’r genau yn 2001.

"Mae angen mesurau ariannol newydd yn enwedig er mwyn dod a’r dirywiad mewn cynhyrchu i ben ac mae’r hyn sydd yn cael ei drafod ar hyn o bryd yn hefyd yn cynnwys premiwm y pen ar gyfer defaid a thaliadau ychwanegol mewn rhai achosion.

"Ond byddai argymhelliad y Comisiwn ar gyfer tagio gorfodol i ddefaid yn costio llawer o arian i’w weithredu.

"Byddaf yn parhau i lobio’n galed ar ran ffermwyr Cymru i’w rwystro rhag mynd yn ei flaen."

Diwedd