Gallai pobl ar eu gwyliau o Gymru elwa o reolau Ewropeaidd newydd i fynd i’r afael â thwyllwyr cyfnodrannu yn ôl ASE Plaid Cymru Jill Evans.
Bu Ms Evans yn galw am reoleiddio llymach ac mae nifer o etholwyr wedi dod i gyswllt â hi wedi iddyn nhw gael eu targedu gan werthwyr unedau cyfnodrannu diegwyddor. Cytunodd Pwyllgor Materion Defnyddwyr Senedd Ewrop yn ddiweddar ar becyn o fesurau yn ddiweddar er mwyn helpu pobl ar eu gwyliau ac i dargedu’r twyllwyr.
Dywedodd yr ASE Plaid Cymru, Jill Evans, sydd yn cynrychioli Cymru gyfan yn Senedd Ewrop:
"Mae nifer o etholwyr wedi dod i gyswllt â fi wedi iddyn nhw gael profiad gwael gyda thowtiaid unedau cyfnodrannu diegwyddor tra ar eu gwyliau. Mae’r bobl yma’n targedu pobl sydd ar eu gwyliau ac yn defnyddio ystod o driciau twyllo i geisio cael nhw i dorri eu henwau ar rywbeth nad ydyn nhw wir yn dymuno ei gael.
"Mae hwn yn broblem ledled Ewrop a gweithredu ar lefel Undeb Ewropeaidd yw’r ffordd iawn ymlaen. Rydym yn cefnogi pecyn o fesurau sydd yn cynnwys 'cyfnod oeri’ er mwyn rhoi cyfle i bobl gael newid eu meddyliau, hyd yn oed wedi iddyn nhw dorri eu henwau. Byddai mesur arall yn galw ar werthwyr unedau cyfnodrannu i roi manylion ysgrifenedig llawn fyddai’n datgelu pwy ydyn nhw a’r hyn maen nhw’n ei werthu.
"Mae nifer o bobl wedi cael profiad da wrth gyfnodrannu, ond yn anffodus mae troseddwyr a thwyllwyr wedi bod yn difetha’r diwydiant yma ers rhy hir. Does gan gwmnïau cyfnodrannu parchus ac onest ddim i’w ofni gan y rheolau newydd yma, ond mae’n bryd cymryd camau cadarn ar draws yr Undeb Ewropeaidd i rwystro’r twyllwyr cyfnodrannu yma."
Nodiadau i olygyddion
* Mae unedau cyfnodrannu eiddo sefydlog wedi eu gosod o dan gyfraith Ewropeaidd ar hyn o bryd. Fodd bynnag, mae gwerthwyr twyllodrus wedi dechrau gwerthu pethau eraill fel “clybiau gwyliau” ac unedau cyfnodrannu ar longau, carafannau ayb. Cynlluniwyd y cynlluniau yma i fod tu allan i gwmpas rheoleiddio cyfnodrannu.
* Erbyn hyn, mae’r pecyn a gytunwyd arni gan Aelodau Seneddol Ewropeaidd wedi cael ei gymeradwyo gan Bwyllgor Materion Defnyddwyr Senedd Ewrop yn Strasbwrg.
* Bydd yn dod o flaen y senedd lawn er mwyn cael ei gymeradwyo yn hwyrach eleni.
Bydd y pecyn yn:
* galw ar holl werthwyr unedau cyfnodrannu a gwyliau i roi manylion ysgrifenedig llawn ynglyn â phwy ydyn nhw a’r hyn maen nhw’n ei werthu;
* rhoi cyfnod i ddefnyddwyr gael yr hawl i dynnu’n ôl o unrhyw beth a lofnodwyd ganddyn nhw;
* gwahardd taliadau o flaen llaw;
* rheoleiddio’r diwydiant “cyfnewid” unedau cyfnodrannu;
* ymestyn y gyfraith i fod yn gyfrifol am "gynnyrch gwyliau hirdymor ". Mae’r rhain yn aml yn gynlluniau tebyg i unedau cyfnodrannu - ond maen nhw’n syrthio tu allan i gyfreithiau sydd yn bodoli ar hyn o bryd ac felly maen nhw’n agored i gael eu camddefnyddio ac i gynlluniau twyllodrus.
