Ganwyd Jill Evans yn y Rhondda ym 1959 ac yno mae hi'n byw o hyd. Mynychodd Jill y brifysgol yn Aberystwyth ac yna gweithiodd fel Cynorthwydd Ymchwil yng nghyn Politecnic Cymru lle enillodd ei gradd M.Phil.

Gweithiodd i Ffederasiwn Cenedlaethol Sefydliad y Merched yng Nghymru am chwe mlynedd cyn cymryd swydd fel Trefnydd Rhanbarthol Cymru ar gyfer CHILD - Rhwydwaith Cenedlaethol Cefnogaeth Anffrwythlondeb.

Roedd Jill Evans yn gynghorydd am saith mlynedd - ar Gynghorau Bwrdeistref Rhondda a Sir Morgannwg Ganol ac yna Cyngor Sir a Bwrdeistref Rhondda Cynon Taf.

Fe'i hetholwyd yn Aelod eiledol Plaid Cymru ar Bwyllgor y Rhanbarthau ym 1993 a gwasanaethu arno am bedair blynedd, ac roedd hi'n cynrychioli'r blaid yng Nghynghrair Rhydd Ewrop, yn cydweithio gyda chwaer bleidiau Plaid Cymru ar draws y cyfandir.

Roedd Jill Evans yn Gadeirydd y blaid rhwng 1994-96. Ym Mehefin 1999 etholwyd Jill Evans a'i chyd-ymgeisydd Eurig Wyn yn ASEau cyntaf Plaid Cymru.

Ailetholwyd Jill i Senedd Ewrop yn 2009 ac mae hi'n aelod o grwp y Gwyrddiaid / Cynghrair Rhydd Ewrop - y pedwerydd grwp o ran maint yn y Senedd.

Jill yw Llywydd EFA a phrif Is-Lywydd grwp y Gwyrddion/EFA yn Senedd Ewrop.

Mae hi'n aelod dirprwyol o'r Dirprwyiaeth dros berthynas â Chyngor Deddfwriaethol Palesteina

Mae hi'n aelod o'r Pwyllgor Amgylchedd, Iechyd Cyhoeddus a Diogelwch Bwyd a'r Ddirprwyaeth Perthynas gyda Irac. Mae hi'n dirprwyo ar y Pwyllgor Amaeth.

Mae hi'n gyn Lywydd Plaid Cymru, yn lefarydd y blaid ar faterion Ewropeaidd a Rhyngwladol ac yn cyn-gadeirydd CND Cymru.